Reina (Faro de Budiño). 25 de maio de 2013.
A Reina, foi aberta en 1971 por A. Dourado e S. Suárez (segundo se indica na agotada Guía de escalada Galicia Vertical). Era unha vía para escalar en autoprotección, xa que ata agora só estaban equipadas as reunións e a placa do penúltimo longo. Sen embargo, como as fendas do primeiro e último longo son uns offwidth que requiren de macrofriends (Camalots do 4 ó 6) e que nelas abundaban a terra e maleza, practicamente non se escalou dende fai anos.
Pero fai algún tempo, Manolo de Lis botoulle o ollo e falou con algún dos seus aperturistas para ver se tiñan inconvinte en que se limpase e equipase, para que fose máis percorrida. De resultas delo, e coa axuda de David, empezaron a limpa-lo impracticable primeiro longo desta fermosa vía, no que a maleza e terra existente nas fendas impedía a súa escalada e unha vez convintemente axeitada en tódolos longos, o Comité Técnico de Escalada del Faro de Budiño, procedeu ó seu equipamento completo durante a fin de semana do 11 e 12 de maio de 2013.
E abofé que esta actuación tivo éxito! 🙂 Esta pasada fin de semana, xa fomos alomenos tres cordadas as que tiñamos pensado probala, ademais dalgunha outra que xa vin que tamén a fixo antes ca nós.
- L1 empeza por fendas e placa (IV) e remata por unha fenda offwidth (V+), 11 parabolts.
- A vía comeza pola misma entrada da Paxariños (no sector Carra), e agora empata os dous primeiros longos orixinais, nun único longo ata o remate do offwidth. Nós non fumos polo interior da fenda, senón polo seu canto. Como está pouco pisada, algúns pitóns romperon ó noso paso (a min coido que foi neste longo que casquei un, pero a Beni rompéronlle varios no primeiro e no último longo).
- L2 empeza por unha placa en travesía (IV+) e segue por unha placa coincidente co último tramo do primeiro longo da Bésame Tonta (6a), 9 parabolts.
- O segundo longo ten unha preciosa travesía horizontal que serve para cambiar de cara e logo segue por unha placa ata a reunión no comezo da fenda final.
- L3 percorre ata o seu remate unha fenda offwidth (V), 7 parabolts.
- O terceiro longo, percorre toda a fenda e pódese resolver polo seu interior (se dominades a técnica do empotre -eu… como que non…-, pola placa á dereita da fenda, ou (coma fixemos nós) en técnica de diedro ou X, é dicir medio corpo apoiado no lado esquerdo da fenda e o outro medio no dereito.
A vía pódese facer con corda de 60 m., está totalmente equipada con parabolts e tódalas reuniones son rapelables.